Талдықорған қаласында көпқабатты тұрғын үйдің жанынан шамамен бір жастағы сәби ауыр халде табылды, — деп хабарлайды «Dalamedia» ақпараттық порталы.

Әлеуметтік желіде тараған мәліметке сүйенсек, оқиға 4-шағынауданда болған. Куәгерлердің болжамынша, бүлдіршін бес қабатты үйдің жоғарғы қабаттарының бірінен құлап кеткен болуы мүмкін.

Жазба авторының айтуынша, оқиға орнында болған тұрғындар бірден жедел жәрдем шақырған. Дәрігерлер баланы ауруханаға жеткізіп, қажетті медициналық көмек көрсетуде. Қазіргі уақытта оның өмірі үшін күрес жүріп жатыр.

Сондай-ақ жарияланған ақпаратта сәбидің кім екені әзірге анықталмағаны айтылған. Алдын ала мәлімет бойынша, оның ата-анасы мен тұрғылықты мекенжайы да белгісіз. Бала медициналық мекемеге аты-жөні анықталмаған күйде жеткізілген.

Аталған жағдайға қатысты Жетісу облыстық полиция департаменті пікір білдірді.

«Қазіргі уақытта бала медициналық мекемеде жатыр. Оқиға бойынша тергеу амалдары басталды. Болған жағдайдың барлық мән-жайы анықталып жатыр. Тергеу қорытындысы бойынша тиісті процессуалдық шешім қабылданады», – деп мәлімдеді полиция өкілдері.