Қызылорда облысының Шиелі ауданында үйінен шығып кетіп, қайта оралмаған 16 жастағы қыздың мәйіті су арнасынан табылды, — деп хабарлайды «Dalamedia» ақпараттық порталы 31-арнаның «Информбюро» бағдарламасына сілтеме жасап.

Марқұмды туыстары мен еріктілер бір тәулік бойы іздеген. Кейін жасөспірімнің мәйіті көрші ауыл маңындағы су арнасынан табылған. Қыздың жақындары оның қазасына күмәнмен қарап, оқушыға қатысты қылмыс жасалған болуы мүмкін деп есептейді.

Марқұмның анасы Гүлжайна Қалдыбаеваның айтуынша, қызы Балсұлу Өмірзақ үш күн бұрын кешкі уақытта құрбысының шақыруымен үйден шығып кеткен. Алайда сол түні үйге оралмаған. Мұны отбасы келесі күні таңертең ғана байқап, бірден іздеу жұмыстарын бастаған.

Туыстарының сөзінше, жасөспірімнің денесі табылған кезде үстінде киімі де, аяқ киімі де болмаған. Ұялы телефоны да әзірге табылмаған.

– Қызымның киімдері жоқ, аяқ киімі де табылмады. Телефоны да жоғалған. Сондықтан оның өліміне біреудің қатысы бар деп ойлаймыз, – дейді марқұмның анасы.

Жақындары Балсұлудың түн мезгілінде ауыл сыртындағы су арнасына жалғыз баруы мүмкін емес екенін айтып, оқиғаның жан-жақты әрі әділ тергелуін талап етуде.

Ал құқық қорғау органдары аталған дерек бойынша қылмыстық іс қозғаған. Қазіргі уақытта тергеу амалдары жүргізіліп, күдіктіні анықтау жұмыстары жалғасып жатыр.

Қызылорда облыстық полиция департаментінің мәліметінше, іс адам өлтіру фактісі бойынша тіркелген. Алдын ала мәлімет бойынша, жасөспірім 2 маусым күні кешке үйінен шығып кетіп, қайта оралмаған.

– Қазіргі уақытта күдіктіні анықтау және ұстау бағытында жедел-тергеу тобы жұмыс істеп жатыр. Әлеуметтік желілер мен мессенджерлерде тарап жатқан кейбір ақпарат шындыққа сәйкес келмейді, – деді облыстық полиция департаменті тергеу басқармасы басшысының міндетін атқарушы Асылбек Бексейітов.