Түркістан облысының Ордабасы ауданында мұғалімнің сот ғимаратында өзіне қол жұмсауға әрекеттенгені туралы ақпарат тарады, — деп хабарлайды «Dalamedia» ақпараттық порталы.

Әлеуметтік желіде жарияланған мәліметке сүйенсек, оқиға 3 маусым күні аудандық сот ғимаратында болған. Жазба авторларының айтуынша, 24 жылдық еңбек өтілі бар педагог Х. Ерімбетов осы жылдың қаңтар айында мектеп әкімшілігінің шешімімен қызметінен босатылған.

Мұғалім бұл шешіммен келіспей, Түркістан облысының еңбек инспекциясына шағым түсірген. Тексеру қорытындысы бойынша инспекция мектеп басшылығына оны жұмысқа қайта алу жөнінде екі мәрте нұсқама берген. Алайда аталған талап орындалмағаны айтылады.

Осыдан кейін педагог өз құқығын қорғау үшін сотқа жүгінген. Дегенмен еңбек дауына қатысты іс бірнеше ай бойы қаралып, түпкілікті шешім шықпаған. 28 мамырда өткен сот отырысында мұғалім судьяға қарсылық білдіріп, сот залынан шығып кеткен.

Кейін оған сот талабына бағынбады деген айыппен әкімшілік іс қозғалып, бес тәулікке қамауға алу туралы шешім қабылданған.

«Алты баланың әкесі бес айға жуық уақыт жұмыссыз жүріп, ауыр күйзеліске түсті. Қолында еңбек инспекциясының оны жұмысқа қайта орналастыру жөніндегі нұсқамасы бола тұра, аудандық сотта әділдік іздеуге мәжбүр болды. Соның салдарынан жағдай осындай деңгейге жетті», – деп жазды әлеуметтік желі қолданушысы Сафуан Жолай.

Желіде тараған ақпаратқа сәйкес, ұзақ уақыт жұмыссыз жүруі мен сот процесіне байланысты туған жағдайлар азаматтың психологиялық ахуалына әсер еткен. Соның салдарынан ол сот ғимаратында өзіне қол жұмсауға әрекеттенген.

Қазір азамат ауруханаға жеткізіліп, дәрігерлердің бақылауында медициналық көмек алып жатыр.