50 жасында ҚазҰУ дипломын алған 32 жылдық тәжірибесі бар алматылық медбике Бағлан Нұрбаеваның оқиғасы желіде кең тарап, көпшіліктің ықыласына бөленді,-деп хабарлайды «Dalamedia» ақпараттық порталы

Бағлан Нұрбаева 19 жасында Алматыдағы республикалық медициналық колледжді тәмамдап, еңбек жолын қаладағы ауруханада бастаған. Ол бір орында 20 жылға жуық мейірбике болып қызмет еткен.

Кейіпкердің айтуынша, мектеп бітірген кезде ҚазҰУ-ға түсу оның бала күнгі арманы болған. Алайда тоқырау жылдарындағы қиындықтар мен отбасылық жағдай оған сол кезде жоғары білім алуға мүмкіндік бермеген. Кейін өмірін екі қызын өсіруге арнаған ол бірнеше жұмысты қатар атқарып, отбасының жағдайын түзеуге күш салған.

Уақыт өте келе ол ҚазҰУ-ға оқуға түсіп, 50 жасында бакалавр дәрежесін алып шықты. Оқу процесі бастапқыда оңай болмағанын жасырмайды. Әсіресе цифрлық жүйелер мен онлайн тапсырмаларға бейімделу қиындық тудырған. Дегенмен ұзақ жылдық тәжірибесі теориялық білімді меңгеруге үлкен көмегін тигізген.

Бағлан Нұрбаеваның айтуынша, бірге оқыған студенттердің арасында әртүрлі жастағылар болған, тіпті 60 жас шамасындағы тыңдаушылар да кездескен.

Диплом алған сәт оның жастық шағын еске түсіріп, ерекше әсер сыйлаған. Ол бұл жетістікке жетуіне жақындарының қолдауы мен өз табандылығы себеп болғанын айтады.