Қаржы министрлігі қазақстандықтардың шетелге шығу деректері не себепті жиналатынын түсіндірді. Ведомствоның айтуынша, бұл жүйе азаматтарды бақылауға емес, тек экономикалық талдау жасауға бағытталған, -деп хабарлайды «Dalamedia» ақпараттық порталы.

Мәліметке сәйкес, ақпарат Халықаралық әуе көлігі қауымдастығы (IATA) мен халықаралық стандарттар негізінде автоматты түрде жиналады. Бұл кеден қызметіне жолаушылардың сапар жиілігін талдауға мүмкіндік береді.

Егер азамат жиі сапарлап, багаж лимитінен асып отырса, жүйе оны коммерциялық мақсатта жүк тасымалдауы мүмкін тұлға ретінде белгілеуі ықтимал.

Сонымен қатар Smart Data Finance жүйесі бірнеше мемлекеттік дерекқорды біріктіріп, тәуекелдерді автоматты түрде анықтауға мүмкіндік береді. Оның ішінде ұшу деректері, жол жүру бағыты және басқа да мәліметтер бар.

Ведомство өкілдері мұндай тәсіл тек тексеруді оңтайландыруға бағытталғанын айтады.