Маңғыстау облысының Мұнайлы ауданында 12 жастағы баланың денесі табылды, — деп хабарлайды «Dalamedia» ақпараттық порталы.

Оқиға туралы аудан тұрғындарының бірі мәлімдеді. Оның сөзінше, алғашында аулада жүрген балалардың бірі марқұмды әткеншек маңында ойнап жүр деп ойлаған. Алайда жақындап барған кезде баланың беті көгеріп кеткенін және аузынан көбік шыққанын байқап, бірден ата-анасына хабар берген.

Куәгерлердің айтуынша, кейін оқиға орнына полиция қызметкерлері мен жедел жәрдем шақырылған. Қазіргі уақытта баланың неден көз жұмғаны әзірге белгісіз.

Бұл деректі жедел жәрдем станциясы да растады. Медицина қызметкерлері оқиға орнына 1 маусым күні барғанын және 12 жастағы баланың қайтыс болғанын анықтағанын хабарлады.

Ал полиция департаменті аталған жағдайға қатысты әзірге ресми түсініктеме берген жоқ.