Астанада жол бойында жеңіл көліктің өртенуі тіркеліп, оқиға салдарынан бірнеше адам зардап шекті, -деп хабарлайды «Dalamedia» ақпараттық порталы.

Қалалық Төтенше жағдайлар департаментінің мәліметінше, оқиға орнына өрт сөндірушілер мен Апаттар медицинасы орталығының мамандары жедел жеткен. Мамандардың күшімен өрт толық сөндірілді.

Алдын ала деректерге сәйкес, өрт сөндіру қызметі келгенге дейін көлікте газ-ауа қоспасының жарылысы орын алып, артынша от тұтанған. Салдарынан маңайда тұрған бірнеше автокөлікке де зақым келген.

Оқиға кезінде зардап шеккендерге алғашқы медициналық көмек көрсетіліп, кейін олар қаладағы ауруханаларға жеткізілді. Қазіргі уақытта өрттің нақты шығу себебі анықталып жатыр.

Төтенше жағдайлар қызметі көлік иелеріне техникалық тексерісті уақытылы жүргізіп, өрт қауіпсіздігі талаптарын қатаң сақтауға шақырды.