Астанада адам ұрлау дерегі бойынша алты шетел азаматына сот үкімі шықты, — деп хабарлайды «Dalamedia» ақпараттық порталы.

Тергеу мәліметінше, 2024 жылғы 9 желтоқсанда топ мүшелерінің бірі жәбірленушіден «көрсетілген қызмет» үшін ақша талап еткен. Ол ер адамға қоқан-лоқы жасап, күш көрсеткен. Соның салдарынан жәбірленуші оған 80 мың теңге аударуға мәжбүр болған.

Кейін күдіктілер жәбірленушіні Астана аумағынан күштеп алып кеткен. Тергеу барысында олардың алдын ала сөз байласып, пайдакүнемдік мақсатта әрекет еткені анықталған.

Сот шешімімен алты адамның барлығы кінәлі деп танылды. Олардың бесеуі 8 жылға бас бостандығынан айырылды. Ал алтыншы айыпталушы адам ұрлауға көмектескені және жеке әрекет еткені үшін 7 жыл 6 айға сотталды.

Айта кетейік, бұған дейін Алматы әуежайында мас шетелдік жанжал шығарып, әуежай мүлкін бүлдіргені туралы ақпарат тараған еді. Полиция мәліметінше, «Алматы – Франкфурт» рейсінің жолаушысы әуежай аумағында тәртіп бұзған.