Қазақстанның әлемдік нарыққа бағытталған мұнай экспортының 80 пайыздан астамы Ресей аумағы арқылы өтеді, -деп хабарлайды «Dalamedia» ақпараттық порталы.

Ресей басшысы өз мақаласында екі ел арасындағы энергетика саласындағы серіктестік жыл санап нығайып келе жатқанын атап өткен. Оның айтуынша, Қазақстанды энергиямен тұрақты қамтамасыз ету мақсатында «Газпром» компаниясының қатысуымен ұлттық газ тасымалдау инфрақұрылымын жаңғырту және кеңейту жоспарланып отыр.

Сонымен қатар, ресейлік бизнес өкілдері қазақстандық серіктестерге баламалы әрі экологиялық таза энергетика бағытында жаңа технологиялар мен бірегей шешімдерді ұсынуға дайын екені айтылған.

Мақалада Қазақстандағы алғашқы атом электр стансасының құрылысы да сөз болды. Ресей басшысы бұл бағытты екі ел арасындағы ұзақ мерзімді стратегиялық әріптестіктің маңызды бөлігі ретінде атап өтіп, «бейбіт атом» саласындағы ынтымақтастықтың жалғасатынын жеткізген.