Ресей тарапы Түркия аумағында салынып жатқан алғашқы атом электр станциясының құрылысына тағы 9 миллиард доллар бөлді. Жобаны толық аяқтау үшін келер жылы кемінде 4–5 миллиард доллар көлемінде шетелдік инвестиция тарту көзделіп отыр.

Түркияның оңтүстігінде орналасқан «Аккую» атом электр станциясының құрылысы жеті жылдан бері жалғасуда. Нысанның бас мердігері – «Росатом» корпорациясына қарасты «Атомэнергопроект» инженерлік компаниясы. Жалпы жобаның құны 20 миллиард доллардан асады.

Алдын ала жасалған келісімдерге сәйкес, «Росатом» бақылау пакетін өзінде қалдыра отырып, жобаның 49 пайыз үлесін инвестор серіктестерге ұсынуы мүмкін. Алайда биыл жазда компания қаржыландыруға қатысты қиындықтарға тап болғанын мәлімдеген. Бұған қаражаттың бұғатталуы себеп болған.

Осы жағдайға байланысты атом электр станциясының алғашқы энергоблогын іске қосу мерзімі бірнеше рет шегеріліп, соңында келесі жылға ауыстырылды.