Ақтөбеде Тургенев көшесіндегі қоқыс контейнерлерінің бірінен пакетке оралған жаңа туған нәресте табылды, — деп хабарлайды «Dalamedia» ақпараттық порталы.

Оқиға 23 мамыр күні болған. Көшеден өтіп бара жатқан тұрғындар жәшіктен сәби жылаған дауысты естіп, кейін пакеттің ішінен баланы байқап қалған. Олар дереу нәрестені қоқыс жәшігінен алып шығып, полицияға хабар берген. Оқиға орнына көп ұзамай жедел жәрдем қызметі де жеткен.

Облыстық полиция департаментінің мәліметінше, сәби уақытында медициналық мекемеге жеткізіліп, дәрігерлердің бақылауына алынған. Қазіргі жағдайы нақты нақтыланып жатыр.

Бұған дейін де елорда маңында және Қосшы қаласы аумағында ұқсас жағдай тіркелгені хабарланған. Ол деректер бойынша да сәбидің жағдайы мен оқиғаның мән-жайы зерттеліп жатыр.

Қазір полиция баланың анасын анықтау жұмыстарын жүргізіп жатыр. Сонымен қатар сәбидің не себепті тасталғаны бойынша тергеу амалдары қолға алынған.