Астанадағы №1 қалалық ауруханада жұмыс істеген медбикеден туберкулез анықталды. Әлеуметтік желіде тараған ақпаратты елорданың денсаулық сақтау басқармасы растады, ,-деп хабарлайды «Dalamedia» ақпараттық порталы.

Бұған дейін желіде аталған ауруханада балалармен байланыста болған медбикеден туберкулез табылғаны туралы ақпарат тараған еді. Басқарма мәліметінше, медицина қызметкерінің жұмысқа рұқсаты болған және ол бұған дейін туберкулезбен байланыста болғандар тізімінде тіркелмеген.

Ресми дерекке сүйенсек, медбике соңғы рет биыл ақпан айында флюорографиялық тексеруден өткен. Ол кезде ешқандай ауру белгісі анықталмаған. Кейін сәуір айында дәрігер көмегіне жүгінген кезде сырқаты белгілі болған. Соңғы рет жұмыс орнына 24 сәуір күні шыққан. Қазір ол Қалалық фтизиопульмонология орталығында ем қабылдап жатыр.

Оқиғадан кейін медбикемен байланыста болған қызметкерлер қайта тексеруден өткізілген. Жалпы саны 39 адамның барлығынан теріс нәтиже шыққан.

Сонымен қатар соңғы үш ай ішінде медбикемен байланыста болған адамдар да анықталып жатыр. Әзірге олардың арасында туберкулез жұқтырғандар туралы ақпарат жарияланған жоқ.

Ауруханада қосымша дезинфекциялық жұмыстар жүргізіліп, төсек жабдықтары мен матрастар арнайы өңдеуден өткен.