Қазақстанда ірі көлемде салық берешегі бар азаматтардың шетелге шығуына уақытша тыйым салынуы ықтимал. Жаңа талап биылғы 1 шілдеден бастап күшіне енеді, — деп хабарлайды «Dalamedia» ақпараттық порталы.

Мемлекеттік кірістер комитетінің мәліметінше, бұл норма жаңа Салық кодексіне енгізілген. Ережеге сәйкес, салық қарызы 116 миллион теңгеден асып, үш ай бойы өтелмеген жағдайда кәсіпкерлер мен ұйым басшыларының елден шығуына шектеу қойылуы мүмкін.

Бұл талап заңды тұлғалардың басшыларына, олардың құрылымдық бөлімше жетекшілеріне, жеке кәсіпкерлерге және жеке практикамен айналысатын азаматтарға қатысты болмақ.

Комитет өкілдерінің айтуынша, мұндай шара бюджет кірісін көбейтуге және қордаланған салық берешегін азайтуға бағытталған. Бұған дейін салық қарызы бар азаматтардың банк есепшоттарын бұғаттау, мүлкіне шектеу қою сынды тетіктер қолданылып келген. Енді оған шетелге шығуға уақытша тыйым салу да қосылып отыр.

Сонымен қатар заңда әлеуметтік жағдайлар да ескерілген. Егер азаматқа емделу үшін шетелге шығу қажет болса, медициналық құжаттарын ұсынған жағдайда шектеу уақытша тоқтатылуы мүмкін.

Мамандардың сөзінше, салық берешегі толық өтелгеннен кейін немесе қарыздың жоқ екені ресми түрде расталса, қойылған шектеу алынады.

Айта кетейік, бұған дейін қаржы сарапшысы Расул Рысмамбетов бұрынғы министрлер мен әкімдерге, сондай-ақ квазимемлекеттік сектор басшыларына қызметтен кеткен соң 15 жыл бойы шетелге шығуға тыйым салуды ұсынған еді. Оның пікірінше, жоғары лауазымда болған азаматтар ел алдындағы жауапкершілікті сезінуі керек.