Алматыда мемлекет қаржысына түсірілетін фильмдерді іріктеудің соңғы кезеңі өтіп жатыр, ,-деп хабарлайды «Dalamedia» ақпараттық порталы Информбюроға сілтеме жасап. Байқау финалына өткен 95 киножобаның авторлары арнайы комиссия алдында өз жұмыстарын таныстырып, жобаларын қорғады.

Питчинг барысында қатысушылардың сценарийі ғана емес, техникалық мүмкіндігі мен шығармашылық тобының әлеуеті де бағаланды. Ұлттық киноны қолдау мемлекеттік орталығының басқарма төрағасы Құрманбек Жұмағали жобалардың бірнеше кезең бойынша іріктелетінін айтты.

Оның сөзінше, финалдан өткен жұмыстар кейін министр басқаратын арнайы комиссияның қарауына жіберіледі. Сол жерде жеңімпаз жобалар анықталады. Ірі картиналарға 500 миллион теңгеге дейін қаржы бөлінуі мүмкін. Мұндай жобаларды «Қазақфильм» секілді ірі студиялар жүзеге асыра алады. Ал негізгі қолдау көлемі 150-200 миллион теңге аралығында болады.

Киножобалар байқауы наурыз айында басталған. Алғашқы кезеңде 300-ден астам өтінім қабылданып, оның 277-сі сарапшылар кеңесінің қарауына өткен. Кейінгі іріктеу нәтижесінде 95 жоба қалған. Енді соның шамамен 20-сы ғана мемлекеттік қолдауға ие болуы мүмкін.

Биылғы байқауда отбасы құндылықтары, ұрпақ сабақтастығы, тарих пен мәдениет, еңбек адамы, экология, спорт және қоғамдық келісім тақырыптарына басымдық беріліп отыр.

Сараптама кеңесінің мүшесі Роза Мұқанова жобаларды бағалауда автордың танымалдығынан бұрын сценарийдің сапасы маңызды екенін айтты.

Оның пікірінше, бүгінгі көрерменге жақын тақырып, тың идея мен есте қалатын кейіпкер ұсына алған туындылар ғана жоғары бағаланады.