Әлеуметтік желіде Астанадағы жаңа LRT станцияларының бірінде төбеден су тамшылап, астына шелек қойылған сәт түсірілген видео тарады, — деп хабарлайды «Dalamedia» ақпараттық порталы.

Кадрларда станция ішіндегі шатырдан су ағып тұрғаны көрінеді. Жазба авторы видеоны “Бір апта да өтпеді” деп сипаттаған. Бұл жайт желі қолданушылары арасында қызу талқыға түсті. Пікір қалдырғандардың бірі мұны әзілге айналдырып, “Тегене шығаратын зауыт тапсырыс қабылдап жатыр” десе, енді бірі жаңа нысандардағы мұндай жағдайларды сынға алған.

Айта кетейік, бұған дейін Астана қаласындағы LRT желісінде қауіпсіздік ережелерін бұзу деректері тіркелген болатын. Кейбір жолаушылар апаттық тежегішті себепсіз басып, вагон есіктерін ашуға әрекет жасаған. CTS мәліметінше, мұндай әрекеттер пойыз қозғалысының уақытша тоқтауына және кешігуге әкелген.

Компания LRT жүйесінің толық автоматтандырылғанын ескертіп, қауіпсіздік талаптарын қатаң сақтауға шақырды. Тәртіп бұзғандар бейнебақылау арқылы анықталып, құқық қорғау органдарына жолданатыны айтылған.

Еске салайық, 16 мамыр күні Президент Қасым-Жомарт Тоқаев Astana LRT жобасын ресми түрде іске қосып, “Әуежай” станциясынан “Ұлттық музейге” дейінгі бағытта алғашқы жолаушы ретінде сапар жасаған еді. Ұзындығы 22,4 шақырым болатын желіде жүргізушісіз 15 пойыз қатынайды. Жоба 18 станцияны қамтиды. Сонымен қатар LRT-ның Қосшы бағытына дейін созылатын екінші кезеңінің құрылысы басталатыны да хабарланған.