Қазақстан Республикасының Денсаулық сақтау министрлігі аутизмді “толық емдеп жібереміз” деген уәделер мен ғылыми негізі жоқ теорияларға сенбеуге шақырды, — деп хабарлайды «Dalamedia» ақпараттық порталы.

Министрліктің мәліметінше, аутизм спектрінің бұзылысы — халықаралық медицина мойындаған нейродамудың ерекшелігі. Мамандар аутизмнің пайда болуын тәрбие, гаджет немесе вакцинамен байланыстыру шындыққа жанаспайтынын айтты.

Ведомство бүгінде аутизмді қысқа уақытта толық емдейтін ғылыми дәлелденген тәсіл жоғын ескертті. Сондай-ақ түрлі “ғажайып ем”, күмәнді дәрілер мен жалған ғылыми әдістер ата-аналарды адастырып, уақыт жоғалтуға себеп болуы мүмкін екенін мәлімдеді.

“Мұндай уәделердің кесірінен кей отбасылар кәсіби көмекке кеш жүгінеді. Ал ерекше бала үшін ең маңыздысы — аутизмді ерте анықтау, уақытылы түзету жұмыстары, білікті мамандардың қолдауы және отбасының белсенді қатысуы”, – делінген министрлік хабарламасында.

Министрлік өкілдері бала денсаулығын хайпқа айналдыруға және ата-аналардың сеніміне манипуляция жасауға жол бермеу қажет екенін де атап өтті.