Денсаулық сақтау министрлігі шетелге сапар жоспарлап отырған қазақстандықтарды хантавирус инфекциясына қатысты сақтық шараларын қатаң ұстануға шақырды, ,-деп хабарлайды «Dalamedia» ақпараттық порталы.

Ведомствоның мәліметінше, сапар барысында кеміргіштермен және олардың бөлінділерімен — зәрі, нәжісі мен сілекейімен байланысқа түспеу маңызды. Сондай-ақ кеміргіштер мекендейтін жерлерге бармау, күмәнді азық-түлік пен суды пайдаланбау ұсынылады.

Денсаулық сақтау министрлігі көшедегі және стихиялық сауда орындарынан тамақ алмауға кеңес береді. Азық-түлікті міндетті түрде жабылатын ыдыста сақтау қажет.

Бұдан бөлек, жабық бөлмелерге кірер алдында оларды желдетіп, дезинфекциялық құралдармен тазалау ұсынылады. Мұндай жұмыстар кезінде қолғап пен маска сияқты жеке қорғаныш құралдарын қолдану керек.

Жаппай жиналатын орындарға барған жағдайда арақашықтықты сақтау, маска тағу және қол гигиенасын сақтау секілді қарапайым сақтық шаралары да ескертіледі.

Министрлік сапардан кейін де өз денсаулығына мән беруді ескертеді. Шетелден оралғаннан кейін 1–8 апта аралығында әлсіздік, дене қызуының көтерілуі, бұлшықет ауыруы, жөтел немесе ентігу сияқты белгілер байқалса, бірден дәрігерге қаралу қажет. Бұл ретте шетелге шыққанын міндетті түрде айту керектігі де еске салынды.

Мамандардың түсіндіруінше, хантавирустық инфекция кеміргіштерден немесе олардың бөлінділері арқылы жұғады. Вирус адам ағзасына шаң, тағам, су арқылы немесе кеміргіш тістеген жағдайда түсуі мүмкін.