Қазақстан азық-түлік бағасының өсу қарқыны ең жоғары елдердің алғашқы бестігіне кірді, – деп хабарлайды «Dalamedia» ақпараттық порталы. 

Тізімді БҰҰ-ның Азық-түлік және ауыл шаруашылығы ұйымы (ФАО) жасаған. Рейтинг алдағы жылда азық-түлік инфляциясына қатысты болжам есебінде әзірленген.

Болжамға сәйкес, ең жоғары өсім Иранда тіркелмек – 49,1%. Одан кейін Аргентина (34,9%) мен Түркия (31,4%) орналасқан. Төртінші орында – 13,7% көрсеткішпен Ангола. Қазақстан 12,2% болжамды көрсеткішпен бесінші сатыға жайғасқан. Тізімде одан кейін Моңғолия (11,9%), Грузия (11,6%) және Эфиопия (11,2%) бар. Қалған елдерде жыл соңына дейін азық-түлік бағасының өсімі 10 пайыздан төмен болады деп болжанған.

Ал Украинада инфляция 9,2%, Қырғызстан мен Беларусьте – 8,6%, Арменияда – 7,6%, Ресейде – 5,8%, Өзбекстанда – 5,7% деңгейінде болады деген болжам жасалған. Сарапшылардың айтуынша, азық-түлік инфляциясына теңге бағасының құбылуы, сауда айналымындағы кедергілер, шикізат бағасының өзгеруі сынды факторлар әсер еткен.

Айта кетейік, Қазақстанда 2026 жылдың ақпан айында азық-түлік инфляциясы жылдық есеппен 12,7%-ды құрады.