Астанада Құрбан айт мерекесі кезінде құрбандық шалуға арналған арнайы орындар белгіленді, ,-деп хабарлайды «Dalamedia» ақпараттық порталы.

Бұл туралы елордалық Дін істері басқармасының басшысы Қайролла Көшқали брифинг барысында мәлімдеді. Оның айтуынша, 27 мамыр күні сағат 06:00-де қаладағы барлық мешітте айт намазы оқылады. Ал құрбандық шалу рәсімі арнайы бекітілген орындарда күн сайын сағат 07:00-ден 18:00-ге дейін жүргізіледі.

Қала әкімдігі тұрғындарға малды белгіленбеген жерлерде союға болмайтынын ескертті. Осыған байланысты елордада құрбандық шалуға арналған бес орын бекітілген. Олар: «Шанхай» базары, «Баракат» базары, «Жайлау» базары, «Шәушен» шаруа қожалығы және «Ет-Хан» ет цехы.

Сондай-ақ Қазақстан мұсылмандары діни басқармасы Құрбан айттың алғашқы күніне арналған айт намазының кестесін жариялады. Биыл онлайн форматта құрбандық шалуға да мүмкіндік беріледі. Арнайы сайт арқылы азаматтар құрбандыққа шалынатын малды таңдап, төлемді QR арқылы аудара алады.