Алматы облысында мектеп бітіру кеші кезінде болған қайғылы оқиғаға қатысты сот үкімі шықты. Кәмелетке толмаған 11-сынып оқушысы Әлібидің өліміне себеп болған іс бойынша айыпталушы 10 жылға бас бостандығынан айырылды. Іс жабық сот отырысында қаралды, — деп хабарлайды «Dalamedia» ақпараттық порталы.

Оқиға 2025 жылдың мамыр айында Қарасай ауданының Долан ауылында болған. Қаскелең қаласындағы мектеп түлектері бітіру кешін коттедж жалдап өткізген. Шара барысында кәуап әзірленіп, бірқатар жасөспірімдер алкоголь ішкені де айтылды. Кейін жастар арасында жанжал туындаған.

Тергеу дерегіне сәйкес, 17 жастағы Әліби араша түсуге тырысқан сәтте қайғылы жағдай болған. Ол қыз баланы қорғап, жанжалды тоқтатпақ болғанда, қарсы тараптағы оқушы оның кеуде тұсына шампур сұғып жіберген. Әліби дәрігерлер жеткенше көз жұмды. Марқұмның жақындары оның сол сәтте мас болмағанын, жағдайды сабырға шақыруға тырысқанын айтқан.

Оқиғадан кейін мектеп әкімшілігі де жауапкершілікке тартылды. Кештің мектеп аумағынан тыс, ескерту мен рұқсатсыз өткенін түсіндірген директор қызметінен босатылған. Сонымен қатар директордың орынбасары мен екі сынып жетекшісіне қатаң сөгіс берілді.

Күдікті жасөспірім уақытша ұстау изоляторына қамалып, оның заңды өкілдері де бала тәрбиесіне қатысты міндеттерін тиісінше орындамағаны үшін әкімшілік жауапкершілікке тартылған.

Іс шамамен бір жылға жуық тергеліп, кейін Алматы облысының қылмыстық істер жөніндегі мамандандырылған ауданаралық сотында қаралды. Сот шешімімен айыпталушы Қылмыстық кодекстің 99-бабы 2-бөлігі бойынша кінәлі деп танылып, 10 жылға бас бостандығынан айырылды.

Сот үкіміне апелляциялық шағым берілгенімен, Алматы облыстық соты алғашқы шешімді өзгеріссіз қалдырды. Үкім 2026 жылғы 14 сәуірде заңды күшіне енген.