Алматы облысы Қарасай ауданына қарасты Қаскелең қаласында халықаралық деңгейдегі заманауи «Dala Stage» кинопавильонының құрылысы басталды. Жаңа нысан іске қосылғаннан кейін мұнда ірі кино жобалар түсіріледі, ,-деп хабарлайды «Dalamedia» ақпараттық порталы.

Әкімдік мәліметінше, кешеннің жалпы аумағы 15 гектарды қамтиды. Соның шамамен 3 мың шаршы метрі өндірістік мақсаттағы ғимараттарға бөлінген. Құрылыс жұмыстарын осы жылдың тамызына дейін аяқтау жоспарланып отыр.

Жаңа алаңдағы алғашқы ауқымды жоба ретінде «Доспехи бога 4: Ультиматум» фильмі түсірілмек. Картинаға режиссерлік ету Роберт Кунға сеніп тапсырылған.

Жобаның басталу рәсіміне Алматы облысының әкімі Марат Сұлтанғазиев қатысты. Іс-шара барысында актердің продюсері Ли Чиу Ва және бірқатар шетелдік студиялар мен отандық компаниялар арасында ынтымақтастық жөнінде келісімдер жасалды.

Салтанатты сәттердің бірі – Джеки Чан жолдаған уақыт капсуласының құрылыс алаңына тікұшақпен жеткізілуі болды.

Жалпы, «Dala Stage» жобасы елдегі креативті индустрияны дамытуға серпін беріп, кино өндірісіне инвестиция тартуға және кәсіби мамандар даярлауға бағытталған. Сонымен қатар халықаралық білім беру орталықтары мен киностудиялармен бірлескен жұмыс жүргізу көзделіп отыр.