Қазақстанда аэротакси жобасын сынау жұмыстары басталды. Алатау маңында ұшқышсыз әуе аппараты байқалып, алғашқы сынақ ұшулары жүзеге асқаны белгілі болды, ,-деп хабарлайды «Dalamedia» ақпараттық порталы.

Жаңа әуе көлігі сағатына 200 шақырымға дейін жылдамдықпен ұша алады. Сонымен қатар ол 250 шақырымға дейінгі қашықтықты еңсеруге қауқарлы. Мамандардың айтуынша, бұл көрсеткіштер қалалық және қала маңындағы бағыттарда қысқа қашықтықты жылдам еңсеруге мүмкіндік береді.

Қазіргі уақытта жоба сынақ кезеңінде жүзеге асырылып жатыр. Техникалық мүмкіндіктері мен қауіпсіздік жүйелері жан-жақты тексерілуде. Алғашқы сынақтар аппараттың тұрақты ұшу режимін сақтай алатынын көрсетіп отыр.

Сондай-ақ әуе көлігін дамыту аясында арнайы инфрақұрылым салу жұмыстары да қатар қарастырылып жатыр. Әуежай іспетті шағын ұшу алаңдары мен қону аймақтарын қалыптастыру жоспарда бар. Бұл болашақта аэротаксиді қалалық көлік жүйесіне енгізуге жол ашуы мүмкін.

Жоба толық іске қосылған жағдайда, сарапшылардың пікірінше, ол қала ішіндегі қозғалыс жүктемесін азайтып, уақыт үнемдеуге мүмкіндік береді.