Ақтөбе облысында белгісіз ұшқышсыз ұшу аппараты құлап, салдарынан өрт шықты,-деп хабарлайды «Dalamedia» ақпараттық порталы.

Оқиға Қарғалы ауданында тіркелген. Дрон құлағаннан кейін шамамен 500 шаршы метр аумақта құрғақ шөп тұтанып, жалын шарпыған. Төтенше жағдайлар қызметі өртті толық сөндірген.

Ұшқышсыз аппараттың бөлшектері Әлімбет ауылының маңынан табылды. Қазір оқиғаның нақты мән-жайын анықтау үшін Ақтөбе облыстық полиция департаменті уәкілетті органдармен бірлесіп тексеру жүргізіп жатыр.

Әлімбет ауылы Ресей шекарасына жақын, Орск қаласына іргелес орналасқан.

Айта кетейік, бұған дейін Батыс Қазақстан өңірлерінде де ұшқышсыз ұшу аппараттарына ұқсас нысандардың табылғаны туралы жағдайлар тіркелген болатын. Ол кезде де құзырлы органдар нақты қорытындыны бірден жарияламай, тексеру жұмыстарын жүргізген. Мамандар мұндай нысандардың шығу себебі әртүрлі болуы мүмкін екенін, оның ішінде техникалық ақау немесе шекара маңындағы бақылау жүйелерімен байланысты жағдайлар да қарастырылатынын айтқан еді.