Сан-Диегодағы мешітте екі жасөспірім тұрғындарға оқ атып, салдарынан үш адам көз жұмды, — деп хабарлайды «Dalamedia» ақпараттық порталы.

Қала полициясының бастығы Скотт Уолдың айтуынша, бұл оқиға жек көрушілік ниетінде жасалған қылмыс ретінде қарастырылып отыр. Қайғылы жағдай Сан-Диего Ислам орталығында болған. Бұл — округтегі ең ірі мешіттердің бірі, қала орталығынан шамамен 14 шақырым солтүстікте орналасқан.

Ислам орталығы аумағында Аль-Рашид мектебі де бар. Мұнда бес жастан бастап балалар араб тілі, исламтану және Құран үйренеді. Абырой болғанда, мектеп оқушылары зардап шекпеген.

Қаза тапқандардың арасында мешіт күзетшісі де бар. Полиция мәліметінше, ол шабуыл кезінде адамдарды қорғауға тырысқан. Қазір қалған екі құрбанның жеке тұлғасы анықталып жатыр. Сондай-ақ бір адам жарақат алып, ауруханаға жеткізілгенімен, оған оқ тимегені белгілі болды.

Екі күдікті де жасөспірім болуы мүмкін. Олар оқиға орнынан бірнеше квартал қашықта, жол бойында тұрған көліктен өлі күйінде табылған. Тергеу барысында олардың шабуыл алдында жергілікті тұрғынға да оқ атқаны анықталған, алайда ол адам аман қалған.

Ислам орталығының директоры, имам Таха Хасан бұл оқиғаны «қасірет» деп атап, орталықтың әрдайым дінаралық диалогты қолдап келгенін айтты. Оның сөзінше, қайғылы оқиға болған күні мешітке ислам дінін танып-білуге келген адамдар тобы да болған.

Америкалық-исламдық азаматтық құқық ұйымдары бұл шабуылды қатаң айыптады. Ұйым өкілі Таджин Низам: «Намаз оқу мен құлшылық кезінде ешкім өз қауіпсіздігіне алаңдамауы тиіс», — деді.

Калифорния губернаторы Гэвин Ньюсом оқиға туралы жедел хабардар етілген. Қазір тергеу амалдары жалғасып жатыр.

Айта кетейік, бұған дейін Бразилияда да жасөспірім мектепте оқ жаудырып, екі қызметкер қаза тапқан болатын.