Талғар ауданы Өстемір ауылы маңындағы «Саз Талғар №2» су қоймасында екі оқушы суға батып көз жұмды, -деп хабарлайды «Dalamedia» ақпараттық порталы.

Қайғылы оқиға туралы хабар 8 мамыр күні 112 қызметіне түскен. Мәліметке сәйкес, ата-анасының қарауынсыз қалған екі жасөспірім демалысқа арналмаған су айдынының маңында болған. Сол жерде абайсызда суға құлап кеткен.

Жалқамыс ауылының әкімі Нұрбол Еріқұлының айтуынша, 9-сынып оқушылары ауылдан шамамен бес шақырым жердегі бөгетке шомылуға барған.

«Бұл су қоймасында шомылуға да, балық аулауға да тыйым салынған. Соған қарамастан балалар суға түскен», – деді ауыл әкімі.

Оқиға орнына жақын аумақтан оқушылардың киімі, телефоны мен велосипеді табылған.

Хабар түскен бойда Алматы облысы Төтенше жағдайлар департаментінің құтқарушылары оқиға орнына жетіп, іздестіру жұмыстарын жүргізді. Нәтижесінде екі жасөспірімнің денесі судан шығарылды.

Төтенше жағдайлар департаменті тұрғындарды су айдындарында қауіпсіздік ережелерін қатаң сақтауға, балаларды қараусыз қалдырмауға және тыйым салынған жерлерде шомылмауға шақырады.