Президент Қасым-Жомарт Тоқаев тарихты үстірт немесе біржақты түсіндірудің салдары ауыр болуы мүмкін екенін айтып, Алтын Ордаға қатысты жеке том алғаш рет жарық көретінін мәлімдеді, — деп хабарлайды «Dalamedia» ақпараттық порталы.

Мемлекет басшысы Алтын Орда дәуірін әлемдік тарихтағы күрделі әрі көпқырлы кезең ретінде бағалап, оны жеңілдетіп түсіндіруге болмайтынын атап өтті. Оның айтуынша, тарихи құбылыстарды біржақты көрсету қателікке ұрындырып, мемлекеттер арасындағы түсіністікке де кері әсер етуі мүмкін.

Президент қазіргі геосаяси жағдайда адамзат тарихынан тек қақтығыстарды емес, керісінше бейбіт өмір мен диалогқа негіз болған тәжірибелерді де зерделеу маңызды екенін жеткізді. Оның сөзінше, соғыс оқиғаларын баяндау оңай болғанымен, бейбіт кезеңдегі дамуды көрсету әлдеқайда күрделі.

Тоқаев әлем жаңа тарихи таңдаулар алдында тұрғанын айтып, ортақ тарихты қалыптастыруда ғалымдардың бірлескен жұмысы шешуші рөл атқаратынын баса айтты. Осы бағытта Қазақстанда Жошы Ұлысын зерттейтін арнайы ғылыми институт құрылғаны да айтылды.

Мемлекет басшысының пікірінше, Жошы Ұлысының мемлекеттік басқару жүйесі, экономикалық дамуы және рухани-мәдени негіздері әлі де терең зерттеуді қажет етеді. Ол Алтын Орданың мұрасын тек әскери-саяси қырынан ғана бағалау жеткіліксіз екенін ескертті.

Сондай-ақ Президент халықаралық ғылыми жобаларды кеңейтіп, Алтын Орда тарихына арналған ірі академиялық еңбектерді бірлесіп әзірлеу қажет екенін ұсынды. Қазақстанның жаңа академиялық тарихында Алтын Ордаға арналған жеке томның шығатыны да жарияланды.