Астанаға мемлекеттік сапармен келген Түркия президенті Режеп Тайып Ердоған мен Қасым-Жомарт Тоқаев бірқатар маңызды құжаттарға қол қойып, екі ел арасындағы стратегиялық серіктестікті жаңа деңгейге көтерді, -деп хабарлайды «Dalamedia» ақпараттық порталы.

Ақорданың мәліметінше, тараптар Қазақстан мен Түркия арасындағы мәңгілік достық және кеңейтілген стратегиялық серіктестік туралы декларацияны бекітті. Сонымен қатар, ресми делегациялар «АНКА» ұшқышсыз ұшу аппараттарын өндіру және оларға техникалық қызмет көрсетуге арналған бірлескен кәсіпорын құруға келісті. Осылайша, Қазақстан бұл дрондар шығарылатын алғашқы шетелдік мемлекет болмақ.

Келіссөз барысында экономикалық жобаларға да ерекше мән берілді. Түркия Қазақстандағы бастамаларға шамамен 1 миллиард доллар инвестиция құюды жоспарлап отыр. Атап айтқанда, Miryıldız компаниясы Абай облысында тау-кен байыту комбинатын салуды көздесе, İskefe Holding Алматыда желатин шығаратын зауыт ашпақ. Ал Orzax Group Түркістан облысында биологиялық белсенді қоспалар өндіретін заманауи кәсіпорын іске қосуды жоспарлап отыр.

Бұдан бөлек, S Sistem Lojistik «Қазпошта» АҚ-пен бірге Ақтөбедегі халықаралық әуежай аумағында логистикалық орталық құруға кіріскен. Сондай-ақ Tiryaki Holding Астанада бидай мен бұршақты терең өңдейтін зауыт салуды қолға алған.

Экономикалық жобалармен қатар, тараптар гуманитарлық бағыттағы ынтымақтастықты да кеңейтпек. Екі ел мәдени орталықтарды дамытуға, білім беру бағдарламаларын ұлғайтуға және медиа саласындағы байланысты нығайтуға уағдаласты. Соның аясында «Абай–Акиф» бірлескен бағдарламасы жүзеге асырылады, Қазақстанда Түркияның «Маариф» қорының екі мектебі ашылады. Сонымен бірге Президент телерадио кешені мен түркиялық TRT ұйымы арасындағы әріптестік дамып, көпсалалы ауруханалар салу жоспары қарастырылған.