Қазақстанда енді 14–17 жас аралығындағы қыздарға да адам папилломасы вирусына қарсы вакцина салу мүмкіндігі беріледі. Бұл шешім жатыр мойны обырының алдын алу мақсатында қабылданған, — деп хабарлайды «Dalamedia» ақпараттық порталы.

Қазіргі уақытта елде 11 жастағы қыздарға жоспарлы вакцинация жүргізіліп жатыр. Сонымен қатар 12–13 жастағы жасөспірімдерге қосымша иммундау жалғасуда.

1 мамырдағы дерекке сүйенсек, 11–13 жас аралығындағы қыздарға 398 мыңнан астам екпе салынған. Оның ішінде 248 мыңы вакцинаның бірінші дозасын алса, 150 мың қыз екінші дозамен қамтылған. Мамандардың айтуынша, вакцина алғандар арасында ауыр жанама әсерлер тіркелмеген.

Санитариялық-эпидемиологиялық бақылау комитетіне азаматтар тарапынан вакцина алушылар қатарын кеңейту жөнінде өтініштер жиі түскен. Осыған байланысты жасөспірімдерді қосымша қорғау және вирусқа байланысты қатерлі ісік қаупін азайту мақсатында Бас мемлекеттік санитариялық дәрігер 13 мамыр күні арнайы қаулыға қол қойды.

Жаңа құжатқа сәйкес, енді 14 жастан 17 жас 11 ай 29 күнге дейінгі қыздарға вакцина ерікті түрде салынады. Екпе алу үшін қыздың өзі немесе ата-анасы (заңды өкілі) келісім беруі қажет.

Вакцина мектептегі медициналық кабинеттерде немесе тіркелген емханаларда жүргізіледі. Қосымша иммундау қолда бар вакцина қоры есебінен жүзеге асырылады.

Айта кетейік, Қазақстанда адам папилломасы вирусына қарсы вакцинация 2024 жылдың қыркүйегінде басталған. Сол кезде 11 жастағы қыздарды жоспарлы түрде егу, ал 12–13 жастағыларды қосымша қамту қарастырылған еді.