Алматы қаласында жастар арасында саналы тұтыну мәдениетін қалыптастыруға бағытталған «Жастар ысырапшылдыққа қарсы. Үнем – Сана – Мәдениет» жобасы бастау алды, -деп хабарлайды «Dalamedia» ақпараттық порталы.

Жоба аясында Алматы қаласы Жастар саясаты басқармасының комьюнити-орталықтарында жастармен кездесулер, түрлі белсенді форматтағы іс-шаралар мен ашық талқылаулар ұйымдастырылып жатыр. Бастаманың басты мақсаты – жас буынға қаржыға ұқыпты қарау, ресурстарды үнемдеу және саналы шешім қабылдау дағдысын қалыптастыру.

Кездесулер барысында қатысушылар шамадан тыс шығын, сән-салтанат үшін несие алу, әлеуметтік желінің ықпалы, сондай-ақ су, электр энергиясы, азық-түлік секілді ресурстарды тиімді пайдалану тақырыптарын талқылауда.

Алматы қаласы Жастар саясатын дамыту мемлекеттік қоры директорының міндетін атқарушы, «QAMQOR CHARITY» қоғамдық қорының төрайымы Бағдат Анарбаеваның айтуынша, тренингтер интерактивті форматта өтіп, қатысушылар күнделікті өмірде кездесетін жағдайларды талдап, нақты шешімдер ұсынады.

«Бүгінгі тренинг “Үнем”, “Сана” және “Мәдениет” бағыттары бойынша ұйымдастырылды. Қатысушылар өмірдегі түрлі жағдайларды саралап, қазірден бастап қолдануға болатын ұсыныстарын ортаға салды», – деді ол.

Жастар күнделікті әдеттердің жеке өмір мен қоғамға әсерін талқылап, тұтыну мен жауапкершілікке қатысты өз көзқарастарын қалыптастырып жатыр.

Қала Жастар саясаты басқармасы үнемшілдік шектеу емес, керісінше саналы таңдау мен жауапкершіліктің белгісі екенін жастарға түсіндіру маңызды екенін атап өтті.

Қатысушылардың сөзінше, мұндай кездесулер ақша мен ресурсты қалай жұмсап жүргенін қайта ой елегінен өткізуге мүмкіндік береді.

Жоба алдағы уақытта жоғары оқу орындары мен колледждерде жалғасады. Челлендж эстафетасы білім беру ұйымдарына жолданып, Алматы жастарының кең аудиториясын қамтымақ.