Астанада жеңіл рельсті көлік жүйесі алдағы 16-17 мамыр күндері іске қосылады, — деп хабарлайды «Dalamedia » ақпараттық порталы.

Бұл туралы City Transportation Systems басқарма төрағасы Асылбек Дүйсебаев пресс-тур барысында мәлімдеді. Оның айтуынша, жобаның жалпы ұзындығы 22,4 шақырымды құрайды. Бағыт елорданың негізгі көшелері мен маңызды нысандарын қамтиды. Олардың қатарында әуежай, Қабанбай батыр даңғылы, «Астана Жұлдызы» стелласы, Mega Silk Way сауда орталығы, Ботаникалық бақ, Abu Dhabi Plaza, Үкімет үйі, Арыс көпірі, Қалдаяқов көшесі, Ұлттық музей және «Нұрлы жол» вокзалы бар.

Пойыздар күн сайын таңғы 06:00-ден кешкі 23:00-ге дейін қатынайды. Жол жүру құны 200 теңге болып белгіленген.

Төлемнің бірнеше тәсілі қарастырылған. Атап айтқанда, FacePay жүйесі арқылы, LRT көлік картасымен (құны – 1000 теңге), Visa және Mastercard банктік карталарымен, NFC арқылы смартфон немесе смартсағатпен, QR-код арқылы, сондай-ақ бір реттік билетпен төлеуге болады.

Астана қаласында тіркелген 7-18 жас аралығындағы оқушылар мен жеңілдік санатындағы азаматтар үшін жол жүру тегін болады.

Желіде 15 пойыз қатынайды, оның төртеуі резервте қарастырылған. Пойыздардың жылдамдығы сағатына 60 шақырымға дейін жетеді. Төрт вагоннан тұратын бір құрам 600-ден астам жолаушыны тасымалдай алады.

Жоба қаладағы қоғамдық көлік жүйесін жаңғыртып, жолаушылар ағынын азайтуға бағытталған.