Алматыдағы жоғары оқу орындарының бірінде білім алып жүрген бірінші курс студенті қайғылы жағдайда көз жұмды, — деп хабарлайды «Dalamedia» ақпараттық порталы.

Оқу орнының баспасөз қызметі таратқан мәліметке сүйенсек, 6 мамыр күні таңғы сағат 09:00 шамасында студент сегізінші қабаттан құлап кеткен. Ол оқиға орнында жан тапсырған. Марқұмның грант негізінде оқығаны белгілі болды.

Университеттің психологиялық қолдау қызметі студенттің осы уақытқа дейін мамандардан көмек сұрамағанын мәлімдеді. Сондай-ақ оның психологиялық жағдайына байланысты ешқандай шағым немесе күмәнді белгі тіркелмеген.

Оқытушылардың айтуынша, студент сабақты жақсы оқыған, тәртіп бұзбаған және оқу орнында жағымсыз мінездеме алмаған.

Қазір университет басшылығы марқұмның отбасымен кездесіп, көңіл айтқан. Сонымен қатар қажетті қолдау көрсетуге дайын екендерін жеткізген.

Аталған дерек бойынша құзырлы органдар тексеру жұмыстарын бастап, тергеу амалдарын жүргізіп жатыр.