Астанада эвакуатор қатысқан жол апаты болып, көлік автобус аялдамасын қағып кеткен ,-деп хабарлайды «Dalamedia» ақпараттық порталы.

Оқиға Нұра ауданында болған. Әлеуметтік желіде тараған видеодан эвакуатордың жолдан шығып кетіп, аялдама павильонына соғылғанын, кейін жаяу жүргіншілер жолағына дейін барып тоқтағанын көруге болады.

Соққы қатты болғандықтан аялдаманың бір бөлігі қирап, маңайдағы жол белгілері де зақымданған. Кадрлардан жаяу жүргінші өткелін білдіретін белгі сынықтардың арасында жатқанын байқауға болады.

Астана қалалық полиция департаментінің мәліметінше, 4 мамыр күні эвакуатор жүргізушісі Айтматов көшесімен келе жатып, көлікті басқара алмай қалған. Соның салдарынан аялдама павильоны мен өзге де инфрақұрылым нысандарына соғылған.

Жол апаты кезінде зардап шеккендер тіркелмеген. Жүргізуші әкімшілік жауапкершілікке тартылып, келтірілген шығынды өтейтін болды.