Танымал жайдарманшы Ақылбек Скендіров Қызылорда–Павлодар бағытындағы пойызда тәртіп бұзғаны үшін 86 500 теңге көлемінде айыппұл төледі, — деп хабарлайды «Dalamedia» ақпараттық порталы.

Оқиға 26 сәуірге қараған түні болған. Сот дерегіне сүйенсек, ол мас күйінде жолаушы әйелге тиісіп, балағат сөздер айтып, тынығуына кедергі келтірген.

Сот барысында Скендіров өз кінәсін толық мойындап, кешірім сұраған. Сот оның әрекетін ұсақ бұзақылық деп бағалады. Бұған дейін жауапкершілікке тартылмағаны ескеріліп, айыппұл салумен шектелді.

Кейін ол әлеуметтік желідегі парақшасында видео жариялап, болған жағдайға қатысты пікір білдірді. Бейнежазбада оның бостандықта жүргені көрінеді. “Басылды ма? Шыға берейін бе? Қатемді кешіріңдер”, – деп жазған ол.

Бұл жағдайға байланысты желі қолданушылары түрлі пікір қалдыруда.Еске салсақ, бұған дейін Қызылорда–Павлодар бағытындағы пойызда бір әйел мас жолаушының агрессивті әрекетіне тап болғанын мәлімдеген еді. Түн ішінде баласымен бірге келе жатқан жолаушы полиция шақыруға мәжбүр болған.

Алайда тәртіп сақшылары шамамен бес сағаттан кейін ғана келіп, түсініктеме алған. Әйел қатты шаршағанын, баласының қауіпсіздігіне алаңдағанын айтып, алғашында шағым түсіруден бас тартқан.

Кейін ол райынан қайтып, ресми арыз жазып, пойыздағы жолаушылардың қауіпсіздігін қамтамасыз ету мәселесін тексеруді талап етті.