Польша Ресейдің мүддесіне тыңшылық жасады деп айыпталған Қазақстанның әскери саласына жауапты өкілі Әнуар Бақыбайды Беларусьпен жасалған тұтқын алмасу аясында босатты ,-деп хабарлайды «Dalamedia» ақпараттық порталы.

Айырбас 28 сәуір күні Польша мен Беларусь шекарасында өткен. «5 те 5» форматындағы келісімге бірнеше мемлекет қатысқан. Ұзаққа созылған келіссөздер нәтижесінде тараптар бірқатар тұлғаларды өзара алмастырған.

Босатылғандар қатарында Беларусь тарапы журналист Анджей Почобут пен католик дін қызметкері Гжегож Гавельді шығарған. Ал Польша Молдовада опасыздық жасағаны үшін сотталған Александр Баланды және ресейлік археолог Александр Бутягинді тапсырған.

Әнуар Бақыбай 2025 жылдың жазында Польшаның Быдгощ қаласында ұсталған. Польша арнайы қызметінің мәліметінше, ол дипломатиялық жамылғыны пайдаланып, мансаптық барлау офицері ретінде әрекет етіп, Польша мен НАТО құрылымдарына қатысты ақпарат жинады деп күдікке ілінген. Ресми дерек бойынша, ол Украинадағы Қазақстан елшілігінде әскери атташе көмекшісі қызметінде тіркелген.

Дипломатиялық иммунитет тек Украина аумағында жүретіндіктен, оның Польша аумағындағы әрекеті құқық қорғау органдарының назарын аудартқан. Киевке тікелей әуе қатынасының болмауына байланысты елшілік қызметкерлері жиі Польша арқылы жүргені де айтылған.

Бұған дейін ол 30–35 жас аралығында екені, отбасылы, екі баласы бар екені белгілі болған. Оның бір баласы Киевте дүниеге келген. Сондай-ақ оның Ресейдегі әскери академияны тәмамдағаны айтылады. Украинадағы Қазақстан елшілігінің әскери атташесі Бақытжан Кисентаев оның ағасы екені де хабарланған.

Бұл іс халықаралық деңгейде пікірталас туғызған. Бірқатар азаматтық қоғам өкілдері Еуропарламент пен Еуропа Кеңесіне үндеу жолдап, істі Қазақстан барлау құрылымдарының ықпалына қатысты мәселе ретінде қарастырған.

Қорғаныс министрлігі Бақыбайдың Қарулы күштер қатарында қызмет ететінін растағанымен, қосымша мәлімет таратпаған. Сыртқы істер министрлігі Польшадағы елшілік тиісті органдармен байланыста екенін хабарласа, Ұлттық қауіпсіздік комитеті бұл іске қатысты ақпараттың жоқ екенін мәлімдеген.