Америкалық Blue Origin компаниясы алдағы NS-36 миссиясының экипаж құрамын жариялады. Алғаш рет Қазақстаннан шыққан әйел ғарышқа ұшуға мүмкіндік алып отыр. Бұл тарихи сапардың қатысушысы – кәсіпкер, FMG маркетингтік холдингінің негізін қалаушы Данна Қарағұсова.
Зымыран New Shepard арқылы жүзеге асатын ұшу қазан айының басына жоспарланып отыр. Сапардың онлайн-трансляциясы компанияның ресми сайтында және әлеуметтік желілерінде көрсетіледі.
Данна Қарағұсова – медиа және іскерлік шараларды ұйымдастыру саласында 25 жылдан астам тәжірибесі бар кәсіпкер. Ол сонымен қатар спортқа жақын, альпинизммен айналысады, Килиманджаро мен Эльбрус шыңдарын бағындырған.
«Адамзаттың болашағы ғарышпен байланысты. Жаңа көкжиектерді игере отырып, біз тек технологияны ғана емес, өз мүмкіндігімізді де кеңейтеміз. NS-36 миссиясына қатысу – мен көп жылдан бері армандаған мақсатқа жасаған қадамым», – деп жазды ол Instagram парақшасында.
Қарағұсова – Қазақстанның бұрынғы еңбек және халықты әлеуметтік қорғау министрі, экс-депутат Гүлжан Қарағұсованың қызы.
Blue Origin осыған дейін 75 адамды ғарышқа ұшырған. Олардың бесеуі бірнеше мәрте сапарға қатысқан. Билет бағасы ресми түрде құпия сақталғанымен, БАҚ деректеріне сәйкес, шамамен 500 мың доллар тұрады.
NS-36 экипаж құрамында:
• Клинт Келли III – инженер, DARPA жобалары аясында алғашқы автопилоттық көліктерді әзірлеушілердің бірі;
• Аарон Ньюман – зерттеуші, «Титаникке» және Мариан шұңғымасына сүңгіген;
• Джефф Элгин – FranChoice франчайзинг компаниясының негізін қалаушы;
• Виталий Островский – украиндық кәсіпкер және инвестор;
• алтыншы қатысушы кейінірек жарияланады.
Еске салсақ, New Shepard зымыраны алғаш рет 2021 жылғы 20 шілдеде ұшырылған еді. Сол сапарға компанияның негізін қалаушы Джефф Безос та қатысқан. Ал билет аукционда 28 миллион долларға сатылған болатын.
DALAMEDIA admin
9
0