Байқоңыр ғарыш айлағында жаңа буынға жататын «Союз-5» зымыран тасығышының алғашқы ұшу-конструкторлық сынағы жүзеге асты,-деп хабарлайды «Dalamedia» ақпараттық порталы.

Ресейдің «Роскосмос» корпорациясы таратқан мәліметке сәйкес, «Союз-5» әлемдегі ең қуатты сұйық отынмен жұмыс істейтін қозғалтқыштардың біріне ие. Бұл жолғы ұшырылым жаңа зымыранның сынақ кезеңіндегі алғашқы ұшуы ретінде тіркелді.

Сынақ барысында зымыранның бірінші және екінші сатылары штаттық режимде жұмыс істеген. «Союз-5» алдын ала жоспарланған суборбитальды траекторияға шығарылып, кейін Тынық мұхит аймағындағы кеме қатынасы мен әуе қозғалысы үшін жабық аумаққа құлаған.

Жаңа зымыранның басты ерекшеліктерінің бірі – жүк көтеру мүмкіндігінің артуы. Ол бұрынғымен салыстырғанда екі есеге жуық көп, яғни 17 тоннаға дейінгі жүкті орбитаға шығара алады. Сонымен қатар, отын ретінде экологиялық тұрғыдан қауіпсіз компоненттер қолданылатыны да атап өтілген.