Ақмола облысының әкімі Марат Ахметжанов өңір тумасы, танымал боксшы Оразбек Асылқұловқа екі бөлмелі пәтердің кілтін табыстады, ,-деп хабарлайды «Dalamedia» ақпараттық порталы.

Салтанатты шара барысында өңір басшысы спортшыны облыстың мақтанышы деп атап, оның жетістіктері жастарды спортқа баулуға серпін беретінін айтты.

Өз кезегінде Оразбек Асылқұлов көрсетілген қолдау мен құрмет үшін алғысын білдірді. Оның айтуынша, сыйға берілген баспана алдағы жарыстарда жаңа белестерді бағындыруға қосымша мотивация болмақ.

Сондай-ақ боксшының жеке бапкері Ерлан Ғазизовке 1 миллион теңгенің сертификаты табысталды.

Айта кетейік, Оразбек Асылқұлов сәуір айында Моңғолияның Улан-Батыр қаласында өткен Азия чемпионатында алтын медаль жеңіп алған болатын. Спортшыны жарқын жеңісімен Қазақстан президенті Қасым-Жомарт Тоқаев та құттықтады.

Оразбек Асылқұлов – 2025 жылғы әлем чемпионы, 2024 жылғы Азия чемпионатының күміс жүлдегері, Қазақстан чемпионы, халықаралық және республикалық турнирлердің бірнеше дүркін жеңімпазы.