Бразилияда өткен жастар мен жасөспірімдер арасындағы әлем чемпионатында қазақстандық семсерлесуші Нұрмұхаммед Жайлыбай ел қоржынына тарихи жүлде салды, – деп хабарлайды «Dalamedia» ақпараттық порталы.

Жекелей сында өнер көрсеткен отандасымыз жарыс барысында сенімді нәтиже көрсетіп, жартылай финалға дейін жетті. Шешуші кезеңде ол Түркия өкілі Яман Фурканмен жолығып, тартысқа толы кездесуде 13:15 есебімен қарсыласына есе жіберді. Соған қарамастан Нұрмұхаммед әлем біріншілігінің қола жүлдесін иеленді.

Жарыстан кейін спортшы өз әсерімен бөлісіп, жанкүйерлерге алғысын жеткізді. Оның айтуынша, бұл жетістік — үлкен еңбектің нәтижесі.

– Әлі күнге дейін жүлде алғаныма сене алар емеспін. Бұл мен үшін ерекше сезім. Ең ауыр кездесу жартылай финал болды. Себебі жауапкершілік жоғары болды, маған сенім артқан жандардың үмітін ақтау маңызды еді. Қолдау білдірген баршаңызға рақмет, – деді Нұрмұхаммед Жайлыбай.

Айта кетейік, бұл нәтиже отандық семсерлесу спорты үшін айрықша жетістік саналады. Бұған дейін жастар мен жасөспірімдер арасындағы әлем чемпионатында қазақстандық спортшылар мұндай деңгейде жүлде алып көрмеген.