Әлемге танымал қазақстандық әнші Димаш Құдайбергеннің Аргентинадағы жанкүйерлері музыкалық аспаптарға мұқтаж мектептерге қолдау көрсету мақсатында жаңа қайырымдылық жобасын бастады. Игі бастаманың алғашқы орындарының бірі Мар-дель-Плата қаласындағы генерал Хосе де Сан-Мартин атындағы №5 бастауыш мектеп болды, — деп хабарлайды «Dalamedia» ақпараттық порталы.

Жанкүйерлер қауымдастығының мүшелері мектепке музыкалық аспаптар жеткізу үшін 400 шақырымнан астам жол жүріп барған.

Осыған орай оқушылар, ата-аналар және ұстаздар үшін мерекелік кездесу ұйымдастырылды. Шара барысында қонақтар Димаш Құдайбергеннің шығармашылық жолы жайында айтып, жиналған жұртшылықты Қазақстанның мәдениеті мен салт-дәстүрімен таныстырды.

Сонымен қатар мектепте ұлттық киімдер, ақпараттық материалдар мен арнайы таныстырылым бұрыштары қойылған көрме ашылды.

Күннің ең әсерлі сәті – мектептің музыка кабинетіне Димаш Құдайбергеннің есімін беру туралы шешім болды. Бұл Аргентина үшін сирек кездесетін әрі символдық маңызы зор оқиға саналады.

Өйткені бұл елдегі білім беру ұйымдарында кабинет пен мекемелерге көбіне белгілі тұлғалардың есімі өмірден өткеннен кейін ғана беріледі. Ал бұл жолы әншінің халықаралық мәдениетке қосқан үлесі ескеріліп, ерекше шешім қабылданған.