Алматы қаласында көшелердің біріне ақын Мұхтар Шахановтың есімін беру мәселесі тиісті комиссиялардың қарауына жолданды, — деп хабарлайды «Dalamedia» ақпараттық порталы.

Бұл туралы қалалық ішкі саясат департаментіне қарасты тілдерді дамыту және ономастика бөлімінің басшысы Бақыт Қалымбет мәлімдеді. Оның айтуынша, әлеуметтік желілерде ақынның есімін көшеге беру жөніндегі азаматтардың өтініштері тарағаннан кейін әкімдік ресми түсініктеме берген.

Қалымбет ақынның ұлттық мәдениет пен әдебиетке қосқан үлесі зор екенін атап өтіп, оның шығармашылық мұрасын жас ұрпаққа таныту мен есімін ұлықтау – ортақ міндет екенін жеткізді. Соған сәйкес, бұл бастама заң талаптарына сай тиісті мемлекеттік органдар мен комиссиялардың қарауына ұсынылған.

Оның сөзінше, алдымен бұл мәселе қоғамдық пікірді ескеру үшін Алматы мәслихатының тұрақты комиссиясында талқыланады. Кейін хаттама жергілікті бұқаралық ақпарат құралдарында жарияланып, ономастикалық комиссияның қорытындысы алынады. Егер барлық кезеңнен оң шешім шықса, ұсыныс республикалық ономастикалық комиссияға жіберіледі. Соңғы шешім сол жерде қабылданады.

Әкімдік өкілдері сондай-ақ қолданыстағы талапқа сәйкес, елге еңбегі сіңген тұлғалардың есімін елді мекендерге беру тек олардың қайтыс болғанына кемінде бес жыл өткен соң ғана мүмкін екенін еске салды.

Айта кетейік, бұған дейін қоғам белсенділері ақынның есімін ұлықтау мақсатында петиция жариялап, оны қазірдің өзінде 10 мыңға жуық адам қолдаған.

Мұхтар Шаханов 19 сәуір күні 84 жасқа қараған шағында өмірден өтті. Соңғы жылдары ол денсаулығына байланысты бірнеше рет ем қабылдаған. Ақын отбасында да ауыр қайғылар болған: 2021 жылы ұлы Рауан Шаханов, ал былтыр қарашада Қуаныш Мұхтарұлы дүниеден озған еді.