Қазақтың біртуар ақыны, Қазақстанның Еңбек Ері Мұхтар Шахановтың соңғы аманаты орындалатын болды. Ақынның денесі Түркістан облысындағы киелі Арыстан баб кесенесінің жанына қойылады, ,-деп хабарлайды «Dalamedia» ақпараттық порталы.

Бұл жөнінде ақынның жиен немересі Қайырхан Балғабеков Kursiv Media басылымына хабарлаған.

Бұған дейін ақынның Алматыдағы «Кеңсай» зиратында жерленетіні туралы ақпарат тараған. Алайда кейін туыстары мен жақындарының өтініші ескеріліп, жерлеу орны өзгертілген.

Ақынның жары Ханшайым Шаханова Мемлекет басшысы Қасым-Жомарт Тоқаевқа хат жолдап, Мұхтар Шахановтың Отырар өңіріндегі ата-бабалар мекенінде мәңгілік тыныс табуды қалағанын жеткізген. Туыстарының айтуынша, бұл соңғы аманат толық орындалатын болды.

Қоштасу рәсімі Алматы қаласында өтеді. 21 сәуір күні сағат 09:00-де Абай атындағы Қазақ ұлттық опера және балет театрынан ақынды соңғы сапарға шығарып салу жоспарланған.

Рәсімнен кейін ақынның денесі Түркістан облысына жеткізіліп, Арыстан баб кесенесінің маңында жер қойнына тапсырылады.