Қазақстанда ұялы телефондардың IMEI-кодтарын верификациялау жүйесін жеке компаниялардан алып, мемлекеттік ұйымға беру жоспарланып отыр,-деп хабарлайды «Dalamedia» ақпараттық порталы деп жаз.

Бұл туралы Цифрлық даму министрінің бірінші орынбасары Ростислав Коняшкин журналистердің сауалына жауап беру барысында мәлімдеді. Оның айтуынша, бұл бағыттағы мәселе үкімет деңгейінде қаралып, нақты шешім қабылданған.

Вице-министрдің сөзінше, енді телефондарды тексеру қызметін толықтай мемлекетке тиесілі ұйым атқаратын болады. Яғни бұл салада мемлекеттік монополия орнату көзделіп отыр.

Қажетті заңнамалық өзгерістер қазіргі уақытта Мәжілісте қаралып жатыр. Егер түзетулер қабылданса, IMEI-кодтарды верификациялау 100 пайыз мемлекеттік қатысуы бар компания арқылы жүзеге асады.

Бұған дейін бұл жүйеге қатысты қоғам тарапынан сын көбейген болатын. Депутат Болатбек Нәжметдинұлы да мәселені көтеріп, тексеру процесін бәсекесіз және нақты құқықтық негізсіз жеке компания жүргізіп отырғанына алаңдаушылық білдірген.

Айта кетейік, 11 ақпанда Цифрлық даму министрлігі мобильді құрылғыларды тіркеу ережелеріне өзгерістер енгізгенін жариялаған еді. Сол кезде телефондарды ақ, сұр және қара тізім бойынша тіркеу жүйесі іске қосылған.

Ақ тізімге тексерістен өткен құрылғылар енгізілсе, сұр тізімдегі телефондар уақытша ғана жұмыс істей алады. Ал қара тізімге сәйкестендіру коды бұрмаланған немесе халықаралық базаға енгізілген құрылғылар кіреді.

Дегенмен кейін әлеуметтік желілерде қазақстандықтар жаңа жүйеге жиі шағым айтып, шетелден әкелінген телефондардың тіркеуден өтпей жатқанын көтерген. Кейбір азаматтар мәселені шешу үшін делдалдар қызметіне жүгінуге мәжбүр болғаны да айтылды.