Астанада блогер ерлі-зайыптылар Ерболат Жанәбілов пен Эльмира Төлегеноваға қатысты сот үкімі жарияланды, — деп хабарлайды «Dalamedia» ақпараттық порталы.

Сот шешіміне сәйкес, Ерболат Жанәбіловке 2 жыл бас бостандығынан айыру жазасы тағайындалып, алайда ол шартты жаза ретінде белгіленді. Сонымен қатар оның мүлкі тәркіленетіні айтылды. Ал Эльмира Төлегеноваға 2 жыл мерзімге бас бостандығынан айыру жазасы кесіліп, оның орындалуы екі жылға кейінге шегерілді.

Сот отырысында тараптар арасында процестік келісім жасалғаны хабарланды. Бұған дейін прокурор бұл келісімді қолдап, айыпталушылар курстарды сатудан түскен 247 миллион теңгені толық өтегенін атап өткен.

Айта кетейік, процестік келісім жасау туралы өтінішті соңғы сөзінде Эльмира Төлегенованың өзі білдірген. Бұған дейін айыптау тарапы оларға 4 жыл бас бостандығынан айыру жазасын сұраған болатын.

Тергеу деректеріне сәйкес, блогерлер өткізген ұтыс ойындары кезінде жүлделер өз қаражаттарымен беріліп жатыр деген түсінік қалыптастырылған. Алайда іс жүзінде барлық қаражат қатысушылардан жиналған. Сот процесі 16 наурызда басталған.