Алматы метрополитенінің құрылысы кезінде қаржы жымқыруға қатысты іс кассациялық тәртіпте қайта қаралып, нәтижесінде үшінші бір заңды тұлғаның есепшотынан табылған 127 миллион теңге мемлекетке қайтарылды, — деп хабарлайды «Dalamedia» ақпараттық порталы.

Бас прокуратураның мәліметінше, «Метрополитен» коммуналдық мемлекеттік кәсіпорнының лауазымды тұлғалары мердігер ұйым өкілдерімен алдын ала келісіп, метро құрылысы мен оны жабдықтауға бөлінген қаражатты жымқырудың жүйесін құрған. Соның салдарынан мемлекетке аса ірі көлемде шығын келтірілген.

Алмалы аудандық сотының үкімімен аталған кәсіпорын мен мердігер ұйымның 10 қызметкері ұзақ мерзімге бас бостандығынан айырылды. Сондай-ақ олардың мүлкі тәркіленіп, келтірілген залалды бірлесіп өтеу міндеттелді.

Кейін іс кассациялық тәртіппен қайта қаралған кезде жымқырылған қаражаттың бір бөлігі – 127 миллион теңге басқа заңды тұлғаның банк шотынан анықталған. Прокурордың наразылығы негізінде сот шешімі өзгертіліп, бұл қаражат мемлекет пайдасына өндірілді.

Бас прокуратура бұл жағдай мемлекеттік қаржыға қол сұққандардың жауапкершіліктен жалтара алмайтынын көрсететінін атап өтті. Сонымен қатар бюджет қаражатын игеру кезінде лауазымды тұлғалар заң талаптарын қатаң сақтап, адалдық пен жеке жауапкершілікті бірінші орынға қоюы тиіс екенін ескертті.