Алматыда прокуратура араласуымен «Медеу» өңірлік табиғи паркіне шекаралас жатқан 288 гектар жер мемлекет меншігіне өткізілді, ,-деп хабарлайды «Dalamedia» ақпараттық порталы.

Қадағалау органының мәліметінше, жалпы аумағы 288 гектар болатын екі жер телімі заң талаптары бұзылып, жеке меншікке берілгені анықталған. Бұл учаскелер ауыл шаруашылығы мақсатындағы, су қоры санатына жататын жерлер болғандықтан, заң бойынша сатуға жатпайды.

Осы дерекке байланысты Жетісу ауданының прокуратурасы сотқа талап-арыз түсіріп, жасалған мәмілелерді заңсыз деп тануды сұраған. Сот бұл талапты қанағаттандырып, келісімдердің күшін жойды.

Алматы қалалық сотының апелляциялық алқасы да төменгі сатыдағы шешімді өзгеріссіз қалдырды. Нәтижесінде құны 17 миллиард теңгеден асатын жер телімдері мемлекетке қайтарылды.

Айта кетейік, бұған дейін де Шығыс Қазақстандағы орман алқаптарында «Бипэк Автоға» тиесілі болған 150 гектардан астам жердің мемлекетке қайтарылғаны хабарланған еді.