Қазақстанда қоғамдық тамақтану орындары әлеуметтік желідегі жазбалары үшін жауапқа тартыла бастады. Енді алкогольге қатысты кез келген контент жарнама ретінде бағалануы мүмкін, – деп хабарлайды «Dalamedia» ақпараттық порталы.

Мәселен, ішімдік бағасы көрсетілмесе де, не сатып алуға тікелей шақыру болмаса да, сусын бейнеленген фото немесе видео заң бұзушылық ретінде қаралуы ықтимал. Осыған байланысты кафе мен мейрамханаларға алкоголь атауларын атамау, брендтерді көрсетпеу, бар көрінісі бар материалдарды жарияламау ұсынылған.

Сондай-ақ кәсіпкерлерге әлеуметтік желіде ұтыс ойындарын ұйымдастырмау және алкоголь мәзірін жариялаудан бас тарту ескертілді. Тіпті кадр сыртында тұрған бөтелкенің өзі тексеріс кезінде тәуекел тудыруы мүмкін.

Мұндай жағдайлар Әкімшілік құқықбұзушылық туралы кодекстің 455-бабы – жарнама туралы заң талаптарын бұзу бойынша қаралады. Заң талаптарын сақтамағандарға ірі көлемде айыппұл салынуы мүмкін.

Сала мамандары әлеуметтік желідегі парақшаларды мұқият тексеруге кеңес береді. Өйткені тек жаңа жарияланымдар ғана емес, бұрынғы посттар мен стористер де назардан тыс қалмайды.

Ал Денсаулық сақтау министрі Ақмарал Әлназарова елімізде кальян шегуге қатысты тыйымды күшейту мәселесі қайта қаралып жатқанын айтты. Оның сөзінше, қоғамдық орындарда кальян тарту деректері әлі де жиі кездеседі. Қазір бұл бағыттағы ұсыныстар Үкімет қарауында.