Елімізде орнатылған “Сергек” камераларының қызметі кеңейіп, тек жол ережесін бұзғандарды ғана емес, қоғамдық орындардағы күмәнді әрекеттерді де анықтай бастады, -деп хабарлайды «Dalamedia» ақпараттық порталы.

Жүйені жасаушылардың айтуынша, бейнебақылау енді төбелес, қауіпті қимылдар, адамдардың күдік тудыратын түрде жиналуы және қараусыз қалған заттарды да назардан тыс қалдырмайды. Камералар әдеттегі қалыптан тыс көріністі байқаған сәтте, ақпарат бірден Жедел әрекет ету орталығына жолданады.

Осының арқасында құқық қорғау органдары оқиға ушығып кетпей тұрып, дер кезінде араласуға мүмкіндік алады.

Мамандардың түсіндіруінше, кез келген жанжал аяқ астынан пайда болмайды. Әдетте ол адамдардың мінез-құлқынан, әрекетінен аңғарылады. Мәселен, топтың күрт көбейіп кетуі, кадрда қаруға ұқсас заттың көрінуі немесе көпшілік арасындағы шиеленіс – қауіптің алғашқы белгілері. Осындай сәттерді Sergek VMS жүйесі дер кезінде тіркеп, дабыл береді.

Айта кетейік, бұған дейін Мәжіліс депутаттары қоғамдық орындарда агрессивті мінез-құлықты бақылау үшін “Сергек” жүйесін пайдалануды ұсынған еді. Олар қоғамда дөрекілік пен ашушаңдық белең алып бара жатқанын айтып, мұндай бастаманың өзектілігін алға тартқан. Қазір бұл бағыттағы кейбір мүмкіндіктер іс жүзінде қолданысқа ене бастағаны белгілі болды.