Астанада өткен Өңірлік экологиялық саммит аясында Қазақстан Үкіметі мен Азия даму банкі елдегі ірі жобаларды қаржыландыру жөнінде келісімге келді, — деп хабарлайды «Dalamedia» ақпараттық порталы.

Келісімге сәйкес, 2026–2029 жылдар аралығында жалпы құны шамамен 5,5 млрд АҚШ долларын құрайтын 15 ірі жоба жүзеге асырылады. Бұл қаражат энергетика, инфрақұрылым, су ресурстарын басқару, цифрландыру және тұрғын үй саласы сияқты негізгі бағыттарға бағытталмақ.

Келіссөздер барысында Азия даму банкі Қазақстанның энергетикалық инфрақұрылымын жаңғыртуға, заманауи технологияларды енгізуге және «жасыл» жобаларды дамытуға қолдау көрсететінін жеткізді. Сондай-ақ тараптар өңірлік байланыстарды күшейту мен инвестициялық ынтымақтастықты кеңейту мәселелерін талқылады.

Жалпы, бұл келісім Қазақстанның ірі инфрақұрылымдық бастамаларын жүзеге асыруға және экономиканы әртараптандыруға қосымша серпін бермек.