Ақтөбеде беташар кезінде көпшілік алдында бума-бума ақша санап тұрған сәті видеоға түсіп, әлеуметтік желіде тараған қалалық мәслихат депутаты Аслан Қайырғалиев тәртіптік жазаға тартылды, ,-деп хабарлайды «Dalamedia» ақпараттық порталы.

Желіде кең тараған бейнежазбада депутаттың той үстінде ақша санап тұрғаны анық көрінеді. Көп ұзамай қолданушылар оның кім екенін танып, қызу пікірталас басталды. Оның әкімнің ұлы екені де жұрт назарынан тыс қалмады.

Алғашында бұл видео той өткен мейрамхананың Instagram парақшасында жарияланып, кейін жергілікті пабликтер арқылы тарап кеткен. Оқырмандар пікірі екіге жарылды: бірі мұны дәстүрдің бір көрінісі деп қабылдаса, енді бірі орынсыз әрекет деп сынға алды.

Қоғамда резонанс тудырған жағдай депутаттық әдеп жөніндегі комиссияның қарауына шығарылды. 20 сәуір күні өткен отырыста бейнежазбалар жан-жақты қаралып, нәтижесінде Аслан Қайырғалиевке сөгіс түріндегі тәртіптік жаза қолданылды.

Мәслихат төрайымы Анар Даржанованың айтуынша, комиссия шешімі дәл осы бейнематериалдарға сүйене отырып қабылданған.

Өз кезегінде депутат бұл әрекетінің орынсыз болғанын мойындады. Оның сөзінше, бұл жақын досының тойы болған, ал жиналған 4 миллион теңгені табыстау міндеті өзіне жүктелген.

«Қазір ойласам, ақшаны солай санағаным дұрыс болмаған. Мақтану ойым болған жоқ, тек эмоцияға берілдім», – деді ол.

Сондай-ақ депутат айтылған сынмен келісетінін айтып, мұндай жағдайдың енді қайталанбайтынын жеткізд