Бүгін, 21 сәуірде Алматыда ақын, халық жазушысы, қоғам қайраткері Мұхтар Шаханов ақтық сапарға шығарып салынуда, ,-деп хабарлайды «Dalamedia» ақпараттық порталы Politico.kz-ке сілтеме жасап.

Қоштасу рәсімі Абай атындағы Қазақ ұлттық опера және балет театры ғимаратында өтіп жатыр. Мұнда марқұмның туған-туыстары мен жақындары, зиялы қауым өкілдері жиналған. Сонымен қатар Парламент депутаттары мен журналистер де келіп, ақынмен қоштасуда.

Жиынға Президенттің баспасөз хатшысы Айбек Смадияров, әнші Димаш Құдайберген және Сенат төрағасы Мәулен Әшімбаев қатысып отыр.

84 жасында дүниеден өткен қаламгер Алматыдағы Кеңсай зиратына емес, Түркістан облысы Отырар ауданындағы Қоғам ауылдық қорымына жерленетін болды.

Жаназа және жерлеу рәсімі 22 сәуір күні таңғы сағат 10:00-де Отырар ауданындағы Жаңа Шілік және Қоғам ауылдарында өтеді. Одан кейін Шәуілдір ауылындағы «Жұлдыз» мейрамханасында ас беріледі.

Ақын 19 сәуір күні аурухананың жансақтау бөлімінде көз жұмған еді. Кейін марқұмның жары Ханшайым Шаханова Мемлекет басшысы Қасым-Жомарт Тоқаев атына өтініш білдіріп, оны соңғы аманатына сай Арыстан баб кесенесі маңына жерлеуді сұраған.

Алайда тарихи нысан аумағында жерлеуге рұқсат берілмейтіні айтылып, кейіннен ақынның Отырардағы қорымға қойылатыны нақтыланды. Бұл ақпаратты жазушылар одағы ресми түрде растап, жерлеу рәсімінің кестесін жариялады.